政壇：屈建制唔幫拖 莫乃光被噓

莫乃光喺創新及科技局議案審議期間腹背受敵，一方面要跟泛民大隊反對，另一方面業界對成立新局嘅殷切期望，畀咗佢好大壓力。舊年十一月創科局成功開局，佢終可鬆一口氣，而楊偉雄亦正式做咗創科局局長嘞，尋日莫乃光喺立法會特首答問大會中更加轉守為攻，企圖將拖延通過創科局嘅責任推得一乾二淨。

笑特首唔識用社交平台

莫乃光尋日一開始就大放厥詞，批評施政報告對資訊科技界嘅支援係「無料到」，更加取笑特首唔識用社交平台LinkedIn同Twitter。特首亦不甘示弱，話點解創科局遲咗三年先可以成局，大家都心中有數，暗批泛民拉布。莫乃光立即反擊，話一二年過唔到，其實係因為建制派議員唔幫政府，唔好賴泛民。言論一出，就引來在座建制派嘩然，並對佢發出噓聲。

其實當時建制派議員反對，主要原因唔係反對成立創科局，而係因泛民揚言拉布，為免議程積壓而出此下策。雖說有建制派反對議案，但主要都係對設立文化局等嘅內容有意見，所以莫乃光話建制派反對成立創科局，確係同事實不符，鑊唔係咁補o架！

同樣要爭取連任嘅新界西直選議員梁志祥，選區議會主席時就曾被質疑疏於地區工作，佢尋日發問時就疑似補鑊，主動提到選區入面嘅一啲土地問題。佢話政府關於收地的政策、補償、拆遷脫離市民需求，又要求特首採納區議員意見，擴闊八鄉南道路。特首就回應基建需要時間，未來考慮中長期供應時，政府會做一啲道路工作。