「為長者折枝，語人曰：『我不能』，是不為也，非不能也。」如果要為呢句古語搵註腳，港府就係最佳例子嘞，一方面坐擁金山銀山，一方面推卸安老責任，縮骨成咁，被人鬧爆有乜出奇吖！

嗱，新一份施政報告出爐，例牌花唔少篇幅講老人問題，今年仲揚言建構長者友善城市，包括推展無障礙通道、延長過馬路綠燈時間、加設長者優先座、增設長者優先廁格、為長者改裝公屋單位、推動長者網絡生活便利化等，姿勢多多，不過社會最關心嘅全民退休保障問題就輕輕帶過，得寥寥幾十字，問你服未。

建構長者友善城市唔係話唔好，不過如果長者連基本生活都有問題，建構乜嘢都無用喇。依家嘅情況就好似一個人病情危急，醫生無為病人對症下藥，只係一味話要搵糖畀佢食，你話係咪荒謬吖？係咪不負責任吖？難怪有人話，施政報告提出延長過馬路綠燈時間同增設優先廁格等建議，表面上無微不至，關心老人，實際上係小恩小惠，敷衍塞責，漠視老人家。

正所謂，綱舉則目張。本港人口老化嚴重，安老制度千瘡百孔，長者貧窮問題更加持續惡化，歸根究柢，就係欠缺健全退休制度，搞到好多市民老無所養，臨老唔過到世。施政報告係港府施政嘅總綱領，家陣對全民退保避得就避，卸得就卸，好似完全無件事咁，安老問題又點可以改善吖？貧窮問題又點可以緩和吖？難為施政報告仲以「改善民生」、「促進和諧」做口號，計太一叮話齋，應該改為「懶理民生」、「促進民怨」至啱。

話時話，施政報告被諷刺為「走數報告」，港產官僚又係出名嘅語言偽術專家，就算對全民退保問題濃筆重墨，都隨時只係口噏噏當秘笈咋。有辦你睇，港府當初聲稱研究落實全民退保嘅可行性，仲煞有介事搵埋學者團隊，點知當提出「全民老人金」方案後，即刻食言打退堂鼓，改為搞咗個掩人耳目嘅假諮詢，擺明當民意無到。港府坐擁龐大財政儲備，今年仲估計高達近千億元盈餘，但係對老人刻薄寡恩，唔通真係唔怕有報應？

當年孟子為長者折枝嘅比喻，提醒梁惠王推行王道仁政，可惜梁惠王充耳不聞，一味假仁假義，欺世盜名，終於搞到民怨沸騰。今日港府對老人家涼薄成性，同梁惠王只係半斤八両嘅咋，叮！