城中鏡：創業秘笈
唔少大學生畢業後都希望嘗試創業，早兩日創意創業會同香港青年創業家協會就合辦咗個晚宴，讓一手一腳創業嘅年輕人聚首，交換創業心得，每位都緊貼市場趨勢不斷應變，好似創意創業會會長、時昌迷你倉創辦人Kevin時景恒咁，就知道近年好多新落成嘅本地住宅單位都好袖珍，揀喺附近開設迷你倉，畀住客擺放唔常用嘅嘢就啱晒喇！
時景恒（左）同創意創業會副會長郭致因交流創業經驗。
鄧耀昇（右）同鄭康宏分享做飲食業嘅心得。
謝棓（右）同香港青年創業家協會會員江陳澄，指人民幣波動對生意影響唔大。
鄭康宏搞「雪糕到會」
當日在場嘅創業人士，好多都年紀輕輕，但個個都有一套獨門創業秘笈，兼魄力十足，好似Lab Made分子雪糕專門店創辦人Ronnie鄭康宏，就充分掌握香港人嘅飲食心態，唔單止講求味道同賣相，仲好講究整個進食前後嘅體驗，所以佢哋近期就將雪糕生意做埋「到會」，帶晒啲工具出去婚宴同派對場地，即叫即造，將炮製雪糕做到好似一個騷咁表演，加埋製作雪糕時飄出嘅氮氣，氣氛一流。
早兩年加入飲食行列嘅「舖王」鄧成波兒子鄧耀昇亦有在場，原來當日活動場地正係佢主場，新開張只有一個月左右，係觀塘工業區內難得一個早晚會「變身」嘅飲食場所。日頭以食街形式，主打廠廈同辦公室午飯時段，附近返工嘅人可以用手機App提早落單，分秒必爭；晚上可化身婚宴、派對場地兼酒吧。
不過，亦有好多人創業初期會觸礁，香港青年創業家協會會長謝棓就係幾經波折先搵到最適合自己嘅創業路，由車會轉做着數網，再轉型做印刷，卻未曾氣餒，勉勵年輕人唔好怕失敗，終有一日會成功。
