買雞蛋都要排長龍？荃灣一間雜貨店，不時聚集大批街坊排隊買歐洲雞蛋，成為區內奇景。最近一則貼子引起網民熱議，「次次行過都見到成村人排隊，我心諗，買雞蛋啫，唔使呀？」究竟是甚麼吸引一眾街坊排完又排，買走一底又一底的雞蛋？有網民指，該雜貨店的雞蛋「大隻又新鮮」，而且更有一般少見的「歐洲蛋」；難得老闆說得老實，唔怕得失客人，坦言：「咪又係雞蛋，羊群心理啫！」文：簡卓鈞/攝：朱偉坤

王太用繩將一底三十隻雞蛋牢牢綁實。

排隊買歐洲雞蛋，近年成為荃灣區奇景。

今期主力出售波蘭雞蛋，紙箱有標籤證明無花假。

歐洲蛋（右）較大陸蛋（左）及泰國蛋稍大。

何先生稱母親想全家吃得放心，才特意光顧這雜貨店。

捲起衣袖，掀起托蛋盒，望一望，合上反轉再睇，無爛，再合上，用繩繞兩個十字，「有無環保袋呀？三十六蚊呀。」又賣出一底共三十隻雞蛋。位於荃灣的一間小小雜貨舖，雖然糧油雜貨樣樣齊，但它更像一間雞蛋專門店，專程前來買雞蛋的街坊絡繹不絕，有老街坊更稱：「有時排足半個鐘都未買到！」

公公婆婆拖手捧場

甚麼令街坊如此捧場？「我哋啲蛋夠新鮮吖嘛！日日都賣晒，唔會留過夜。」老闆娘王太着記者輕碰一下雞蛋，「嗱！凍o架！啱啱喺雪櫃拎出嚟o架咋！」要數舖頭最好賣的，一定是歐洲雞蛋，「一日都賣三、四十箱o架。」王太屈指一算，一箱十二底，一底三十隻，即一日賣過萬隻雞蛋！

踎低又起身，上了年紀的王太把雞蛋、托蛋盒和紙皮箱在舖面與後欄之間搬來又搬去，「今日落過雨，啲盒濕咗會軟，啲蛋好易爛。」細心的王太蹲在門口，一邊檢拾地上的紙碎，一邊唸唸有詞，「街坊覺得你老實就自然會幫襯你囉。」的確，不少頭髮花白的公公婆婆手拖手來捧場。

旁邊五金水電舖的老闆則謂，「佢哋喺呢條街三十幾年喇，平時都係個仔、新抱同王太看舖，日日都咁多人排隊。」兒子王先生則解釋，一直都有賣歐洲雞蛋，「只係近四、五年先hit，一個傳一個，羊群心理吖嘛，見人排你又會想排，歐洲蛋喎，呢排賣緊波蘭蛋，之前有賣過法國、葡萄牙、荷蘭蛋，可能啲人聽落覺得矜貴啲啩。」

對於在網絡世界揚名立萬，王先生一家人卻面露愁容，「平時最多有二十幾人排隊，再多啲人嚟，我哋都做唔切，真係唔知點算！」王太則說，「人哋點讚係人哋嘅事，萬一其他人嚟到買完唔鍾意咁點？」不過一眾街坊一於少理，繼續排隊直至「天荒地老」。

第一手消息請下載on.cc東網iPhone/iPad/Android/Windows Phone Apps