政壇：搞搞政：選立會唔夠秤 黃之鋒搵人霸位

綜合各方消息，學民思潮正拉攏「社區公民約章運動」成員同其他「傘兵」，合作出戰九月立會選舉，希望藉佔領行動餘波，以及傘兵喺舊年區議會選舉有好表現嘅氣勢，爭取多於一個議席。據悉，佢哋已成功協調成員出選其中四區，新界西屬意「社區公民約章運動」同土地正義聯盟成員朱凱迪出選；九龍東人選會係學民思潮前發言人黎汶洛；九龍西會係青年新政「女神」游蕙禎；至於香港島就係學聯秘書長羅冠聰。

司法覆核成功 勢踢走羅

據悉，黃之鋒屬意喺香港島出選，認為可食正當區嘅泛民中產票源，加上白鴿黨等泛民政黨換班，佢嘅機會將大增，但未夠「秤」就成為佢嘅阻礙。佢最後成功向學聯中勢力較弱、又較溫和嘅羅冠聰埋手，說服佢代為出選，但心中暗自盤算，係先搵羅冠聰霸位，等其他傘兵唔好加入香港島戰團，若司法覆核成功，佢就會踢走羅冠聰，同戰友周庭孖住出選。

其實學民仔心思思想殺入立會，確係有迹可尋，除咗黃之鋒提出司法覆核外，同樣未夠秤嘅周庭，就頻頻搞網上直播谷人氣，就連黎汶洛日前亦都成立個人網上專頁寫日記，又積極喺遊行示威中現身，呢啲舉動，好明顯係為選舉鋪路。但按現時進度，司法覆核肯定未能趕及九月選舉前有結果，黃之鋒嘅如意算盤未必打得響，搞場司法覆核大龍鳳，其實只係大想頭「諗多咗」。