尋日喺一個護膚活動見到模特兒曾咏,誕下女兒個半月後,首次出席公開活動嘅佢透露,自己已近乎完全收身。佢透露B女取名為Haley甘熙兒,如今重十磅多。問佢會唔會掛住BB?佢話:「會,就算夜晚佢一喊,我就會起身,加上依家餵人奶,特別攰同困身,每晚起碼餵兩次,都有揼出嚟。BB好鍾意埋身,又識撩人玩。」問到BB生得似邊個?佢笑言:「對眼好彩似我,因為我老公單眼皮。頭形就似我老公,有少少男仔頭,希望大啲面形會長啲、女仔啲。」

曾咏誕下女兒後,首次出席公開活動。

佢坦言正計劃舉辦百日宴,但暫時未決定中式抑或西式。問佢係咪全面復工?佢話:「如果要吹大風,就一百日之後會好啲。因為我籌備緊出一本關於產前產後點保養嘅書,因為坐月坐得好嘅話,身體真係會健康好多,所以依家我好好補身。」同場仲有名媛楊張新悅、現役香港游泳隊代表歐鎧淳等。

第一手消息請下載on.cc東網iPhone/iPad/Android/Windows Phone Apps