政壇：張炳良慘變「菠蘿雞」
立法會工務小組委員會尋日續議總值一百九十六億元嘅高鐵超支追加撥款申請，泛民主派議員繼續就無聊問題拉布，白鴿黨前黨員、現任人民力量議員「大舊」陳偉業就喺會上大鬧曾經都係白鴿黨成員嘅現任運輸及房屋局局長張炳良係「菠蘿雞」，批評佢一味靠佔人便宜上位，搞到張炳良全程黑面，非常無癮。此外，社民連「長毛」梁國雄亦指工程界議員盧偉國個腦有問題，涉言語冒犯他人。
長毛：腦有問題係稱讚
喺會議上，建制派嘅議員話若果高鐵工程爛尾，香港將得不償失，會「含淚」支持撥款，但本身反對高鐵工程撥款嘅大舊，一開口就已經藉銅鑼灣書店負責人李波失蹤事件，大鬧政府唔理市民生死，又話張炳良係「菠蘿雞局長」，經常推卸話海關、中港關係等唔係其職權。
喜好同大舊鬥嘴嘅鍾樹根，立即打斷大舊發言，要求大舊澄清乜嘢係「菠蘿雞」。大舊藉解釋用詞，又大鬧一番，話「菠蘿雞」即係「靠黐」，好似張炳良見白鴿黨有利益就做副主席，選唔到副主席就退黨，做咗官就唔再表明平反六四。
反轉議會嘅事接二連三上演，人民力量「慢必」陳志全開會唔夠一個鐘，就提出休會辯論議案，主席盧偉國覺得議員其實仲有好多問題想問官員，建議慢必收回休會辯論議案，點知就被長毛話佢個腦有問題。盧偉國裁定長毛咁講有冒犯，叫長毛收回，但長毛反稱盧偉國中文差，腦中有提出嘅問題，即係代表有思考，係讚賞，仲話只有傻瓜先無問題。會議最後用咗兩個鐘，仍然得唔出結論，撥款申請又要留待下回分解喇！
