難民問題係國際性災難，歐洲國家固然搞到焦頭爛額，香港亦係尾大不掉，所謂嘅免遣返酷刑聲請人士唔止喺香港白食白住，而且好多係亡命之徒，唔係劈友就係販毒，唔係打劫就係睇場，唔係打黑工就係犯風化案，簡直烏煙瘴氣，七國咁亂。

港府知唔知道問題嘅嚴重性呢？梗係知喇，如果唔係就唔會急急補鑊喇。嗱，有消息話鑑於聲請個案愈積愈多，港府計劃增加入境處人手，加快清理爛攤子，同時計劃將入境處負責調查及審理工作嘅「執法及遣送審理部」分拆，並新增一個助理處長職位，專責帶領聲請審理工作咁話。

即係咁，難民潮愈演愈烈，滯留個案早已突破一萬大關，當局計劃增加人手，加快清理積壓個案，固然係應有之義，但如果以為咁就可以解決問題，咁就太天真嘞。唔係嚇你，現時平均每月新增四百宗免遣返聲請個案，即係全年增加四千七百幾宗，而且人數不斷上升，就算當局點樣加快審理，都快唔過人蛇嘅增長速度o架。更何況，人手有涯，而難民無涯，入境處以有涯追無涯，又點可以解決問題呢？

事實上，港府唔係未試過類似嘅補鑊措施喇。好似前年三月咁，就推出同時處理酷刑、不人道待遇、迫害三項聲請嘅統一審核機制，又係聲稱可以加快審理，點知事與願違，積壓個案不減反增。事實證明，難民問題就好似一隻已經爛透嘅煲，小修小補無用嘅，盞嘥時間嘅啫，當局唔對症下藥，只會令問題不斷惡化，遲早爆煲嘅咋。

講到尾，與其揚湯止沸，不如釜底抽薪，港府最應該做嘅，就係全盤檢討政策，堵塞漏洞，咁先至可以收斬草除根之效。係人都知，難民問題遏之不絕，皆因港府中門大開，來者不拒，呢個問題唔解決，就算點樣增加人手，點樣加快審理，都係嘥氣嘅咋。家陣超過九成九聲請者都係假難民，港府每年耗費巨額公帑養佢哋，仲埋下治安隱患，簡直愚不可及。咪話太一叮唔提醒，家陣恐襲威脅無處不在，萬一有極端恐怖分子扮成難民混入，咁就大件事嘞！

講到呢度，太一叮不禁諗起東郭先生嘅故事，德國發生震驚國際嘅難民集體性侵及搶劫案，固然係引狼入室，香港綁住個假難民炸彈，一樣與狼共眠，再唔快快拆彈，遲早爆大鑊嘅咋，叮！