「港牌陀飛輪」創辦人William沈慧林同「夢想成真愛心基金」名譽理事長Edwin莊家豐，向來熱衷慈善公益活動，兩人一拍即合。早前，佢哋合作設計咗兩隻特製陀飛輪腕錶用作慈善拍賣，為Edwin嘅慈善基金會籌得三十萬元善款。William話：「個慈善基金係幫助一啲小朋友實現藝術方面嘅夢想，好有意義。」佢哋今年仲打算繼續推出一系列以慈善、藝術為主題嘅腕錶添！

沈慧林（左）同莊家豐打算搵唔同國家嘅藝術家設計腕錶，喺唔同地方籌款。

問到係咪由佢哋操刀設計？William話：「Edwin讀建築同室內設計出身，佢設計出嚟嘅嘢好靚。佢都識好多唔同國家嘅藝術家，所以我哋都打算邀請唔同嘅藝術家合作，一來可以喺唔同地方籌款，幫助更多人，二來又可以提升香港品牌去國際水平。」此外，William亦向運動界埋手，仲邀請咗香港桌球天王傅家俊合作。

第一手消息請下載on.cc東網iPhone/iPad/Android/Windows Phone Apps