政壇：花旗林智剛 靠KYC挽人才
銀行業內有KYC（Know Your Customer，認識你的客戶）方針，即係要了解個客啲料，花旗環球個人銀行業務零售銀行業務主管Lawrence林智剛就話，對員工一樣要多啲傾偈收吓料，咪等到人哋遞信先解決。但聽聞就算Lawrence收到信，都一樣有計留人。
林智剛話無論係客戶或員工，都要收多啲料。（資料圖片）
啱啱升職擔大旗嘅Lawrence話自己每次轉職，都會同上司傾偈，望對方指點方向，所以當自己做主管後，都鍾意「落地」同員工溝通，一有時間就去分行打個白鴿轉，觀察吓前線嘅工作習慣。
講到溝通，佢對挽留人才亦有番兩道。話說公司有位好能幹嘅女員工，生咗第二個BB冇耐就想辭職，皆因佢第一個小朋友啱啱升小學，屋企得一位工人，佢自己又要返工，驚分身不暇湊唔到兩個小朋友。但Lawrence覺得問題「No Big Deal」，毋須辭職解決，於是酌情延後嗰位員工嘅返放工時間，就成功挽留人才。
Lawrence話唔只員工辭職呢啲緊急關頭要傾偈，平日都要多啲關心員工，仲話唔同員工有唔同傾偈方式，「有啲鍾意飲住咖啡傾，有啲鍾意摸住酒杯傾，甚至要去海旁散住步傾，總之對員工都要做好KYC！」唔知Lawrence自己又鍾意邊種傾法呢。
