政壇：搞搞政：李漢奸恨被擄 借勢興波作浪

佔領中環發起人之一、港大法律學院副教授戴耀廷、學民思潮召集人黃之鋒同李漢奸，尋日出席一個由港大法律學院主辦嘅論壇。黃之鋒一開始就主動提到銅鑼灣書店股東失蹤事件，李漢奸就立即打蛇隨棍上，稱「覺得拉咗之鋒，拉咗我，或者拉埋在座三個人，香港民主可能更加快嚟，香港人醒覺會更大」。言論一出，嚇到黃之鋒叫李漢奸唔好誇口，連戴耀廷都立即打圓場，指李漢奸言論只係「黑色幽默」。

與黃之鋒一唱一和

三人講咗一小時先入正題，對於香港前途問題，黃之鋒話覺得現時嘅立法會議員喺群眾冇認受性，認為佢哋選舉得嚟嘅群眾基礎同社會運動嘅群眾基礎有落差，以致喺抗爭中經常喺邊緣位置，講到只有佢出選先可以代表群眾咁。而李漢奸亦附和，指年輕一代好重要，更加支持黃之鋒申請司法覆核立法會地區直選嘅參選年齡，讓黃今年九月可以參選，作出一啲突破。兩人一唱一和，莫非想為司法覆核造勢？

去到論壇尾段，李漢奸亦不忘提及同屬「搞事四人幫」成員、外號「民主阿婆」嘅前政務司司長陳方安生。李漢奸指香港前途是屬於每一個港人，好欣慰有如此多人出席論壇，因為民主阿婆上次出席港大學生會論壇時只有一個學生捧場，搞到黑面無癮離開，黃之鋒仲加把口，叫大家唔好再提呢件事，以免陳太「老人家」會嬲喎！李漢奸同黃之鋒一老一嫩踩低泛民盟友、抬高自己，認真係臭味相投。