政壇：漁灣傘兵勢拔「根」

徐子見同東區翠灣區議員古桂耀，尋日就分別去咗申訴專員公署同樹根嘅黨友辦事處投訴，仲擺埋街站抗議添！

徐子見尋日聯同沙田區議員葉榮等人去咗申訴專員公署，投訴房屋署違反優先編配辦事處畀當區區議員嘅指引，縱容喺區會選舉落敗嘅樹根，以及樹根黨友、喺沙田頌安選區輸咗畀葉榮嘅EQ葛珮帆，批評樹根同EQ均以立法會議員名義續租辦事處。徐子見仲話，市民求助或涉及私隱，如果區議員無辦事處用，會妨礙市民向區議員求助。

任期租期 應同屆滿

唔止徐子見，投訴樹根嘅仲有古桂耀，佢話向房屋署查詢租用當區辦事處事宜時，發現原來辦事處仲畀上屆區議員關瑞龍同樹根所屬嘅建仔租緊，要下月底先會搬走，令佢會見市民好唔方便。樹根回應話，房屋署嘅指引係講緊當區議員優先編配空置嘅舖位，而佢嗰個就一直用開，所以申請續租。

不過，當初樹根係以區議員身份租用舖位，租期理應到舊年年底區議員任期屆滿完結，必須交還舖位畀房署作重新編配，依家佢以立法會議員身份續租，房署喺呢次事件上係咪有行政失當呢？