「藍廢紙、黃鋁罐、啡膠樽」，三色回收箱嘅宣傳口號曾經街知巷聞，可惜得個噏字，廢物分類及回收措施講咗二十年，一直有姿勢冇實際，唔止失敗，簡直失禮。

呢，環境運動委員會成員尋日隨機抽查公眾地方嘅三色回收箱，發現裏面乜都有，牙籤、廢紙巾、膠匙羹等等，當中只有一成可以回收；反而屋苑嘅回收箱成效就高得多，有啲年收入達到十萬元添，其中舊衣物最有市場。

點解兩者有咁大分別？咪就係因為屋苑回收箱管理完善，而公眾回收箱冇人理囉。所以話，港府環保政策一味大隻講，設立回收箱之後就關人個關，而且宣傳不足，好多市民到依家都唔清楚各色回收箱嘅真正用途，有啲甚至唔知道膠袋屬回收物料之一，結果亂晒大龍，回收箱形同虛設。

大家都知道，保護環境，人人有責，大部分市民都願意為環保出一分力，弊在港府做嘢唔湯唔水，甩甩漏漏，加上三色回收箱同垃圾桶比例嚴重失衡，部分地區每三十幾個垃圾桶至有一套回收箱，叫人點樣分類回收呢？

有外判商反映，每日大約接收四噸回收箱物料，其中半噸係垃圾，需運往堆填區處置，搞到每日都要派八至十個人專門揀選回收物，大大增加回收難度。承辦商認為市民「乾淨回收」意識不足，其實，港府宣傳不足至係主要原因。

講起真係醜怪，香港話就話係國際都會，但廢物回收遠遠落後於其他地區。日本九十年代初已實行廢物分類，家陣已經非常成熟，每個家庭都自動自覺將廢物分門別類；而台北十幾年前亦開始推行一系列垃圾回收計劃，開頭都有啲阻力，當地政府軟硬兼施，加上宣傳教育，結果成效顯著，家陣台北市人均垃圾量只有香港一半，呢啲咪叫世上無難事，只怕有心人囉。

話時話，環保有好多途徑，除咗廢物回收之外，節約能源亦係其中一個辦法。有環保組織去年七至九月舉行「知慳惜電」比賽，超過二千六百個用電戶參與，結果節省近四千萬度電，慳電幅度達百分之六，相等於減少二點八萬噸二氧化碳；其中有參與者改善照明系統，用電量大減一成七添。

正如古人話齋，勿以惡小而為之，勿以善小而不為。環保應該從小處做起，並持之以恒，唔可以好似港府咁雷大雨小，虎頭蛇尾，知冇！