立法會日前審議俗稱「網絡23條」嘅《2014年版權（修訂）條例草案》，但第二度因法定人數不足而流會，事後建制同泛民主派例牌互相指摘。不過，有「壞孩子」之稱嘅自由黨繼續貫徹自由風格，喺流會件事上兩邊都唔幫，寸爆建制派時更毫不留情，完全係內訌鬼打鬼。

為確保立法會每個時段都有足夠法定人數，建制派過往曾實行過編更制以防流會，但有聲音不滿只有佢哋留守，泛民就「飲咖啡溝女」，久而久之編更制已壽終正寢。但自由黨議員張宇人（Tommy）尋日話，該黨內有自行編更，上周四流會後，佢仲同其他建制派議員講笑話，距離流會只有五分鐘，但該黨已經有四個人喺會議廳內。

Tommy又話，現時唔計醫學界議員梁家騮、主席曾鈺成及正在休養嘅鄉議局前主席劉皇發，只剩下四十名建制派議員，如果要有足夠法定人數，即係最多只容許五至六名議員離開會議廳，可惜好多人成日唔見影，好似上周流會時，新民黨兩名議員及經民聯梁美芬都不在席，唔知係咪暗批部分建制派議員無心留守呢？

第一手消息請下載on.cc東網iPhone/iPad/Android/Windows Phone Apps