春江水暖鴨先知，一個地方經濟好壞，前景如何，只要睇消費信心就知道。唔使問阿貴，香港問題多多，危機重重，消費信心都唔慌高得去邊。

呢，城市大學關於兩岸四地去年第四季嘅消費者信心調查顯示，香港話就話比對上一季微升百分之一點六，但整體得分只有八十三，依然嚴重偏低，落後於內地及台灣，證明港人消費信心認真麻麻。

呢項調查分開經濟、就業、物價、生活、購買房屋同投資股票六個類別，最高分數係二百分，香港除咗生活狀況一項比較理想，其餘全部低過一百分。當中以購買房屋類別最悲觀，只有五十八點二分。正如學者話齋，調查結果顯示受訪者對購買房屋嘅信心頗低。

咁又難怪嘅，本港樓價持續飆升，已經到咗高不可攀嘅地步，莫講基層市民負擔唔起，中產階層同樣望樓興嘆嘅咋。冇錯，美國加息後，本港樓價有轉勢迹象，差餉物業估價署最新數據顯示，去年十一月私人住宅售價指數跌穿三百點，已連跌兩個月。問題係，就算樓價點樣下跌，依然令人望而生畏，對於無殼蝸牛嚟講，置業夢一樣係遙不可及。

除咗房屋問題積重難返，經濟前景同樣滿布陰霾，特別係旅遊業不景，打殘成個消費市道，更係隱憂重重。最近多項數據都顯示香港經濟正走下坡，有人甚至預計農曆新年後可能爆發企業結業及裁員潮添。淨係睇吓市面有咁多吉舖，連旺區亦唔例外，就知道經營環境幾咁惡劣，唔怪得連李超人都話今年「生意難做」。

大家都知道，美國進入加息周期，而內地經濟又面臨下行壓力，加上人民幣持續下跌，簡直係雪上加霜。二○一六年啱啱過咗幾日咋，內地股市已經出現兩次熔斷停市，引發全球金融市場劇烈波動，香港首當其衝，都咪話唔大鑊。正所謂，一榮俱榮，一損俱損，外圍形勢不妙，香港都幾難獨善其身，喺咁嘅環境下，港人又何來有消費信心呢？

講到底，最令港人冇信心嘅始終係港府，香港面臨內憂外患，港產官僚仲係不思進取，一味望天打卦，想有運行都幾難喇。可以見到，香港近年發展停滯不前，競爭力跌跌不休，周邊城市紛紛爬頭，再咁落去，香港唔止沉淪咁簡單，分分鐘瓜直都似。無論點都好，新嘅施政報告及財政預算案就快出爐，希望港產官僚唔好再令人失望喇，叮！