城中鏡：劉心悠義賣番梘助病患
喺一個運動品牌活動上見到藝人Annie劉心悠，將會第十年參加十公里馬拉松比賽嘅佢，除即席分享備戰心得，仲帶咗一系列手工皂慈善義賣，幫助患有黏多糖症（MPF）嘅病患者，佢仲即席送咗一包手工皂畀本地長跑界跑手紀嘉文。
劉心悠將第十年參加十公里馬拉松。（資料圖片）
劉心悠（左）即場送咗包手工皂畀紀嘉文。
問Annie係咪親手做皂？佢話：「我有去幫手，了解咗點做一舊番梘，因為我對個造型有要求，所以係為我度身訂造，間接了解咗做番梘嘅過程同材料。一包有齊唔同嘅味，有朱古力、牛奶、薄荷味等等，我最鍾意蜂蜜味，我連包裝上面張卡都有整香味㗎。第一次咁深入去了解點整番梘，今次整咗一百五十包限量版嚟義賣，限量版唔會有炒價，因為定咗價，一百八十蚊一包。我知呢次義賣都籌唔夠錢㗎，但起碼可以畀人知道呢個病先，因為真係好多人都唔知。」
佢仲透露外形似餅乾嘅手工皂造型係自己設計，亦花心思親手包咗五十份，並再三提醒大家：「呢啲唔係餅乾，我有責任提醒大家，喺個牌上面都注明咗唔可以食。」Annie又話要睇吓呢次義賣嘅反應，構思日後點再為MPF籌辦慈善計劃或活動，仲透露自己都捐咗十萬元去幫助呢個病啲小組（黏多糖症暨罕有遺傳病互助小組）。
