城中鏡：鳳冠儷「仁」
新年伊始，仁愛堂打頭陣舉行周年慈善餐舞會，晚會主題為「百鳥朝凰‧孔雀開屏」，所以唔少到場名媛都花枝招展，仁愛堂主席Kimmy史顏景蓮頭戴孔雀飾物，同主題襯到絕，全晚游走會場招呼賓客，咁落力，目的係為一班患病兒童籌款。
史顏景蓮（右）當晚頭戴孔雀飾物響應晚會主題，同丈夫、前主席史立德到場。
曹貴子（右）諗到條好橋，搞手機app籌款，旁為仁愛堂前總理陳達華。
李慧芬（左）揀咗沈運龍（右）珠寶店有專利權嘅鑽石手鏈同戒指。
曹貴子搞app撳善款
Kimmy話仁愛堂為咗特殊兒童醫療同藥物需要，成立咗「仁愛堂兒童醫療基金」，資助患上專注力失調同過度活躍症嘅六至八歲兒童早日作專業評估，預計首年有六百人受惠。佢哋仲會推出「中醫音樂治療先導計劃」，為腦退化症患者提供非藥物治療。
一次過搞咁多項目，真係無財不行。Kimmy話雖然市道麻麻，但善長一向支持開佢哋，相信影響唔大。仁愛堂副主席曹貴子就諗到條好橋，話說佢近期搞咗個手機應用程式（app），提供平台畀善團，將想推行嘅項目放上平台籌款，邊個善長有興趣就可以撳入去捐錢，就算唔捐錢，都可以留言支持，至今反應唔錯。
同場仲有仁愛堂總理沈運龍、李慧芬、蔡少森同禤國全，其中做開珠寶生意嘅沈運龍同李慧芬密密斟，原來講起李慧芬「識貨」，買咗沈運龍珠寶店內有專利權嘅鑽石手鏈同戒指，所以沈運龍遠睇已經認得李慧芬戴緊自己公司嘅珠寶喇！
