近排樓價插晒水兼交投冰封，連啲地產代理行都感受到寒意。話說有日經過代理行，發覺啲賣樓標語變晒樣。之前市道好時嗰啲「一閃即逝」固然已經逝去咗，但連平時見開嘅「四房望海」、「家庭最啱」、「還價即成」都變晒做「不要炒魷」、「嫁入豪門」、「老公聽話」！何止係新年願望，直頭完美反映代理心中所想。

地產代理個心諗緊乜？一眼見晒。

近呢幾個月，二手價閒閒哋跌過百萬已唔罕見，但都仲係唔覺有人爭買，有開咗十幾年嘅細行話，已四、五個月冇開過買賣單，話呢行「沒有明天」。連業界人士都預計，農曆新年後會有五百至六百間地產代理要摺。咁嘅時勢，有邊個唔諗住「不要炒魷」？最好就係「嫁入豪門」，入咗門就梗係想「老公聽話」。

咁睇嚟都好絕望喎，跟住走快兩步去咗銅鑼灣，點知見到吉舖街招個代理名叫「方開單」！佢阿爸係咪咁有先見之明幫佢改個咁嘅名就唔知，但佢好想開單就係人都知囉！

第一手消息請下載on.cc東網iPhone/iPad/Android/Windows Phone Apps