政壇：「阿媽」贈頸巾 麥美娟「長」戴
經常自嘲要搵個好老公嘅工聯會立法會議員Alice麥美娟，未搵到好老公之前，原來一早搵多個好媽媽。新一屆葵青區議會日前召開首次會議，身兼該區區議員嘅Alice開會都攬住條頸巾，愛不釋手，唔通係初戀男友送嘅？Alice即時呼召人稱「珍姐」嘅資深區議員譚惠珍同佢影張合照，笑稱係對方早年買畀佢嘅，數數手指已經差唔多二十年歷史。
譚惠珍（左）同麥美娟「母女情深」。
珍姐話當年見到塊布料覺得幾適合，所以送畀Alice，但估唔到Alice咁長情，一條頸巾用咗咁多年。Alice亦加把口，話成個葵青區議會，除咗珍姐，只有議員黃耀聰二人年資比佢深，可以叫佢「妹妹仔」，所以Alice一早已經當咗珍姐係媽媽，形容二人「母女情深」，仲透露自己同珍姐個仔同年添！難怪珍姐真係當正Alice係女咁。唔知珍姐有冇介紹好人家畀Alice識呢？
