香港大學校務委員會主席懸空逾一個月後，政府上月底宣布委任李國章為校委會主席。港大校長馬斐森尋日出席活動時話，期望同李國章緊密合作兼加強溝通，相信校委會未來會繼續維護港大校譽，並以大學嘅最佳利益為前提，推動港大發展。馬斐森強調校委會主席任命事宜一直公開透明，唔認為港大嘅學術自由受到威脅。

馬斐森唔認為港大嘅學術自由受到威脅。

馬斐森話港大係受政府資助嘅機構，並非「完全自主」，因此受政府同公眾關注實屬合理，有人對港大提出反對聲音亦係健康嘅迹象。佢認為好多證據都顯示香港各大學擁有學術自由，並享有崇高嘅國際聲譽，佢期待同李國章及新任校委團結合作，提升港大嘅聲譽。

對於有指行政長官梁振英呼籲商界人士勿向大學捐款，馬斐森認為有關報道純屬傳言，強調大學唔能夠單靠政府撥款，社會捐款亦係大學嘅財政來源之一。佢好感謝社會各界支持，並指梁振英亦有幫助港大促成捐款。

第一手消息請下載on.cc東網iPhone/iPad/Android/Windows Phone Apps