政壇：曾鈺成長毛結伴聖誕遊

由於激進泛民主派透過不停響鐘點算開會法定人數，令前日立法會大會因法定人數不足而流會，未能如期審議《2014年版權（修訂）條例草案》，搞到主席曾鈺成都嬲嬲哋，表明唔能夠接受。

不過，我哋發現曾鈺成同促成流會嘅其中一個「罪魁禍首」、社民連「長毛」梁國雄，原來舊年年底雙雙遠赴波蘭共度聖誕，朝夕相對足足六日。不過，長毛並未因今次旅程放軟「拉布」態度，似乎一心拖死草案。

曾鈺成同長毛喺立法會成日針鋒相對，長毛仲多次因行為不檢被曾主席逐出會議廳。我哋翻查立法會議員個人利益登記冊，發現曾主席同長毛分別申報喺舊年十二月二十二至二十八日，接受義工組織同本地電視台嘅贊助和邀請，到波蘭華沙、霧芝同格旦斯克，了解當地義工工作，行程包括探訪當地貧窮家庭、為獨居同流浪者籌備平安夜慈善聚餐，又同當地研究香港文化嘅研究生會面，討論香港教育同港人身份認同問題，全程嘅機票、食宿開支均獲得贊助。