政壇：搞搞政：旅遊業戰火延燒 林少麟劍指立會
旅遊業「內戰」持續多日未見「停火」，其中人稱「平頭」嘅香港旅遊從業員聯會（旅聯會）榮譽會長林少麟唔單止發起不合作運動，該會仲計劃趁旅遊業議會（旅議會）下周二開會發起遊行，狙擊行動不斷。聽聞一系列嘅行動不但針對旅議會，仲劍指九月嘅立法會旅遊界功能組別選舉。
早前有傳旅議會新任主席、康泰旅行社董事總經理黃進達有意進軍立會，但據悉黃只係煙幕，佢個人未有計劃參選；亦傳出旅議會前主席胡兆英有意參選。至於已六十幾歲嘅金怡假期董事長葉慶寧過去三次出戰都敗北而回，假如佢今屆決定退下火線，有傳林少麟就會披甲上陣，挑戰香港中旅社副董事長、現任旅遊界議員姚思榮。據聞旅遊界已就立會選舉開設WhatsApp群組討論人選。
喺旅遊界功能界別約一千七百多票入面，經營出、入境團業界壁壘分明，葉慶寧過去多年票源都係嚟自接待入境團業界，加上姚思榮嚟自中旅社，票倉龐大，葉要開拓票源並唔容易。謝偉俊喺○八年當選旅遊界議員，都全靠成功拉攏兩個對家先成事。
本報問過林少麟，佢承認業界有討論過參選嘅問題，但佢仍然鼓勵葉慶寧繼續參選，畢竟六十幾歲仲算年輕，但強調今次業界行動並非葉幕後主使，只係朋友之間互相提醒，批評有人想藉此分化業界，現時應該先集中火力清除旅議會內嘅「癌細胞」。不過，姚思榮就回應話，暫時未考慮連任問題，目前都係盡力維護業界利益行先，又認為業界所謂「內鬥」並非如外界所想像複雜。
