政壇：AV仁花重金輸鑊甘

早前曾報道過，AV仁嘅對手何君堯喺區選中花咗接近五萬元，而另外兩位對手沈錦添同阮偉忠，只係花咗二萬多元，但AV仁幾乎用盡選舉開支上限，最後仍然以二百多票之差，敗給對手何君堯，證明咗「錢多唔係贏硬」。

AV仁今次選舉落敗除咗失去服務十五年嘅屯門樂翠選區議席，仲要為選舉「找數」，若扣除政府每票資助同佢所屬白鴿黨捐贈嘅五千元，最後AV仁埋單都唔嘢小。

未清宣傳品 再罰八舊

但AV仁因未有喺區選後自行清除街上宣傳品，因而被食環署罰款八百多元。反觀AV仁嘅黨友，新任北區區議員林卓廷就獲黨贊助一萬多元，最後佢花咗五萬多元，扣除咗黨嘅贊助同政府每票資助額，最後只須付萬多元便能獲得議席。相信該黨對選舉捐贈有唔同安排，可能係按參選人嘅從政資深程度而定。

另外，自稱獨立嘅大律師林作舊年挾「港姐冠軍男友」之名，喺區議會選舉狙擊黃大仙龍星選區、競逐連任嘅人民力量譚香文，成功炒熱該區選戰氣氛。

翻查二人選舉期間嘅開支，發現二人同樣為選舉斥資四萬多元，但譚香文喺選舉期間共發出逾四萬封電郵、近九千個電話短訊同二千七百多個電話錄音，以網絡結合電話攻勢「狂炸」選民，難怪力壓以年輕、專業掛帥嘅林作連任。