立法會烏煙瘴氣，七國咁亂，大家早就見怪不怪，諗唔到嘅係，新年後復會第二日即刻上演流會鬧劇，而且係一個月第二次，唔到你唔服。正所謂，沒有最離譜，只有更離譜，立法會淪為垃圾會，香港唔亂至奇吖。

件事係咁嘅，立法會尋日繼續二讀版權修訂條例草案，反對派一開波就施展拉布戰術，不斷要求點人數，點到第十六次，建制派終於失守，會議宣告流會。事後雙方例牌互相指摘，互相卸責，簡直係醜上加醜。

雖然話立法會流會已經係家常便飯，但一復會即流會，就真係令人嘆為觀止喇。政客不務正業，版權修訂條例已開咗九次會議，耗費六十個小時，至今依然通過無期。有反拉布議員建議日以繼夜、夜以繼日開會，希望加快審議進度喎。其實，喺激進議員百般阻撓下，就算加長會議時間，都只會聽到更多「催魂鐘」嘅咋，完全無意義。

冇法子喇，反對派政治掛帥，為反對而反對，為拉布而拉布，唔將香港搞死，又點會收手吖。呢，有人揚言就算版權修訂條例完成二讀，一樣可以透過立法會大會提交法案，要求成立小組再討論。咁搞法，呢場拉布戰唔知仲要鬥到幾時，你話煩唔煩吖？

所以話，立法會流會未必係壞事，至少市民唔使再聽到政客吵吵鬧鬧，樂得耳根清淨吖嘛。有讀者建議，立法會應該繼續放長假，直至選出新一屆立法會為止，唔係冇道理o架。議員由公帑供養，理應履行職責，議政論政，可惜事實啱啱相反，今日嘅所謂議員有破壞冇建設，唔係拉布就係嗌交，唔係爆粗就係掟嘢，唔係睇AV就係睇艷照，咁樣嘅立法會係咪應該摺埋呢？

話時話，立法會拉布成災，受阻嘅又點止版權修訂條例吖。財委會就快審議港珠澳大橋及高鐵工程追加撥款，必定又係寸步難行，如果闖關失敗，兩項重大工程隨時爛尾，到時何止成為國際笑話，直頭係香港超級災難添吖。有人話，立法會再咁落去，隨時成為壓垮香港嘅最後一根稻草，唔係杞人憂天o架。

唉，今日香港妖孽當道，群魔亂舞，想有運行都幾難。書局職員失蹤事件鬧到滿城風雨，箇中內情依然撲朔迷離，如果掉番轉頭，唯恐天下不亂嘅政客統統消失，咁就一天都光晒咯，係咪！