城中鏡：樓市展「雄」心

位於黃竹坑嘅「香港青年協會賽馬會社會創新中心」尋日舉行開幕典禮，呢個地方係協成行活化嘅工廈，當中有部分樓層係以相當於市值租金三分一水平，出租畀慈善機構或社企，所以David梗要出席喇！講起內地遊客減少，有經營精品酒店嘅佢就話唔考慮將酒店改變用途，皆因市道終有好轉嘅一日。

徐立之穩陣派驚創業

創新及科技局局長楊偉雄同港科院創院院長徐立之亦有到場。見徐立之笑容滿面，原來佢啱啱去多倫多探孫仔，難怪心情大靚。現場有年輕人主動向徐立之介紹自己研發嘅產品，徐立之自言好驚嘆，話從未想過創業，事關佢性格保守，鍾意十拿九穩，但做生意要有冒險精神，唔多啱佢喎。

「鑽的」創辦人Doris梁淑儀同做生物科技嘅水中銀國際董事總經理Jimmy杜偉樑，就同大家分享創業經驗。Doris話創業第一年好似燒銀紙咁，佢以為公司好快要倒閉，好在後來改變策略，情況先至有改善。Jimmy就鼓勵年輕人，創業除咗要有人脈同堅持外，仲要夠「厚面皮」，唔好怕瘀喎。