有關銅鑼灣書店老闆及多名股東離奇失蹤事件迅速發酵，泛民主派連日質疑內地執法部門越境執法，又要求外國政府發聲捍衞「一國兩制」。過去多次到英美「唱衰香港」、外號「李漢奸」嘅白鴿黨創黨主席李柱銘同「民主阿婆」前政務司司長陳方安生，近日亦埋怨英方只顧同中方嘅經濟貿易利益，懶理今次失蹤事件。兩人至今仲妄想前宗主國英國會理佢哋嘅片言隻語，認真癡人說夢。

李漢奸同民主阿婆係過氣嘅政治「舊電池」，平時「抽水」已號召力欠奉，最近因應李波失蹤事件不斷升溫，二人又不甘寂寞，趁機向外國傳媒說三道四。其中李漢奸聲稱，今次事件係香港九七回歸後最令人擔心嘅單一事件，質疑如果唔盡早處理好，外界對「一國兩制」點會有信心。

其後佢仲疑把矛頭指向英方，批評英方對香港猶如「可恥的漠視」，只熱衷於同中國進行貿易。民主阿婆嘅說法亦如出一轍，仲竟然代表香港市民話，港人認為英方唔再關注香港，反而只關心一切同中國之間喺金錢同貿易投資來往。唔知民主阿婆憑乜嘢代表香港市民發聲？

昧於國際形勢自討沒趣

兩人由過去對前宗主國英國低聲下氣，到今日轉為批評英方只顧經濟貿易利益，而唔願就重要事件盡量發聲，其實佢哋只要認清事實，就知道仲妄想英方出手介入或對個別事件施壓，根本係緣木求魚。雖知包括英國在內等國家，都將目光放喺經濟正在崛起嘅中國，希望可以從中分一杯羹。

遠嘅唔講，喺約兩個半月前，國家領導人訪英時，中英雙方簽署總額四百億英鎊嘅商貿協議，外界就知要打救經濟不景，其中一招就係北望神州。李漢奸同民主阿婆如繼續昧於形勢，凡事政治大過天，最終只會自討沒趣，甚至被歷史洪流淹沒。不過，更重要係目前仲未清楚成件失蹤事件嘅來龍去脈，唔知道佢哋想英方點發聲呢？

第一手消息請下載on.cc東網iPhone/iPad/Android/Windows Phone Apps