西貢區議員「哪吒」方國珊自稱係「第三力量」，尋日報名參加立法會新界東補選。雖然哪吒多年嚟都強調自己既非建制、亦非泛民，係真正獨立無黨派區議員，但屬於泛民陣營嘅民協立法會議員KK馮檢基就被讀者發現，喺新界東地區同哪吒「孖公仔」掛橫額，懷疑KK或民協暗撐哪吒，違反泛民協調後一致撐公文袋楊岳橋出戰補選嘅承諾喎。

我哋問過KK，佢話係一場誤會啫，佢承認同哪吒一向有就某啲民生議題合作，但啲橫額多個月前已開始掛，唔代表佢或民協支持哪吒參選，強調民協仍係全力支持楊岳橋，冇轉軚或陽奉陰違。佢仲話根據選舉規例，哪吒或有關當局有責任喺哪吒報名參選後移除有關橫額，如果哪吒遲遲都唔做，佢會主動提醒哪吒，似乎係想同哪吒劃清界線。

哪吒雖得唔到KK嘅祝福，但佢尋日報名參選時，就咁啱撞到自稱獨立民主派嘅沙田區議員陳國強，陳仲即時簽字提名佢作「加持」添！

第一手消息請下載on.cc東網iPhone/iPad/Android/Windows Phone Apps