政壇：侯志強圖修會規搣懶名

舊年有關全港區議員開大會嘅統計數據顯示，發現北區區議員囊括三甲，本身係上水鄉事委員會主席嘅侯志強更榮登「大懶蟲」榜首。北區區議會尋日舉行首次會議，侯志強喺討論區議會常規時，就提出將出席新界鄉議局會議同鄉事委員會會議，納入為缺席區議會大會嘅請假理由，唔通佢想藉此搣甩大懶蟲污名？

侯志強提出將出席鄉議局及鄉委會會議納入區議會請假理由。

一般而言，區議員連續三次未獲批准而缺席會議，將會喪失議席。侯志強喺會上提出將出席鄉議局及鄉委會會議納入請假理由，皆因呢啲會議唔係無中生有，又指外邊人唔理解佢周身事務，如果達唔到村民嘅要求，自然會被唾棄，到時「使鬼區議會炒魷魚咩？」

另外，最近盛傳鄉議局有意派人參選立法會選舉，有鄉紳透露，二十七鄉鄉民一致贊成要搵人出選，認為靠其他建制派代出頭爭權益，始終都係隔咗一層。又話過往有村民寧願投畀激進泛民主派都唔投畀建制，假如鄉事派真係派人出選，相信可以令投激進泛民嘅村民歸隊。