政壇：65%教師劣評 吳得掂捧蛋

幼園至大學搞一鑊泡

吳得掂喺全城爭議全港性系統評估（TSA）期間，以私人理由缺席公聽會，畀議員同市民鬧爆，事後先知呢個私人理由，係佢走咗去日本睇紅葉，佢咁大膽同不顧一切嘅程度真係令人嘩然，佢亦因為咁完全失去教師嘅信心。教協尋日公布嘅調查結果發現，前年同舊年都有約一半受訪教師認為吳得掂值零分，而今年就有足足六成半受訪教師認為佢值零分，睇嚟佢真係愈來愈唔掂！

立法會教育界議員葉建源話教師最關注嘅新聞係TSA，而吳得掂就為去日本睇紅葉，缺席相關嘅公聽會，加上近日大學學術自由倒退，又唔重訂幼園教師薪級表，吳得掂嘅表現之差，政府應該多加注意。

平均分插至十一點二

葉建源又話三分之二嘅受訪教師認為吳得掂一無是處，以五分為滿分嘅話，九成六都只會畀兩分，如果以一百分為滿分，吳得掂平均分亦只有十一點二分，如果小朋友咁低分，都唔知點同家長交代，批評吳冇心冇力，唔知發生緊乜嘢事，又唔知自己做緊乜，其實只要肯做少少嘢，相信都會高分啲，點知一年比一年差！

當問及吳得掂下屆係咪唔應該留低繼續做局長，葉建源就話呢個問題唔使講都知答案啦，對於吳得掂應該如何自處，任何知所進退嘅人，都應該思考呢個問題喎。