筲箕灣：違泊猖獗 靠害過路行人
「呢度真係由朝到晚都泊滿車，兩條行車線得番一條，除咗影響交通，仲好阻行人視線！我有次推住架BB車想過馬路，爭啲因為睇唔到有車嚟緊而畀車撞！」筲箕灣居民楊先生指東大街違泊問題嚴重，要求警方加強巡視及執法，以免意外發生。
筲箕灣東大街違泊嚴重，雙黃線亦泊滿車，市民質疑警方執法力度不足。（讀者提供）
警方發言人表示，柴灣分區非常關注區內的交通狀況，巡邏警員會按情況採取不同程度的執法行動，以確保道路安全及交通暢順。過去一年，警方共接獲九十九宗涉及上址一帶的交通投訴，並發出一千零五十八張定額罰款告票。
「希望警方執法再緊啲，尤其係泊喺雙黃線嗰啲！如果罰款額提高，應該阻嚇力會大啲，希望考慮吓！」楊建議警方就執法行動檢討及改善，以有效減少違規情況。
