假和尚無法無天 真官僚眼睜眼閉
旅遊業每況愈下，旅客買少見少，不過有種另類旅客仲係源源不斷，就是南下搵食嘅丐幫。佢哋仲有變身嘅本領，一時係「殘障乞丐」，一時係「輪椅歌女」，一時係「叩頭婆婆」，一時又披上袈裟扮和尚呃錢，咁搞法，香港容乜易變成丐幫之都o架。
年關將近，連日有大批和尚打扮嘅內地人攻陷各個遊客旺區，佢哋身披袈裟，手持銅鉢，似模似樣咁周圍化緣，如果你以為遇上得道高僧，大發慈悲慷慨解囊，咁就上當啦喂。本報記者連日追查發現，呢批疑似和尚行徑鬼祟，化緣時一般會喺袈裟僧袍內着定便服，點解？原來係為咗見到警察可以即刻金蟬脫殼，當警察一走，隨即披番件袈裟繼續「做生意」，咁都得？
仲有喎，呢批假和尚有時鍾意隊番兩罐啤酒，有時更加會煙癮起，公然喺港鐵站內旁若無人咁吞雲吐霧，直頭無法無天。最離譜嘅係，被人踢爆後居然仲理直氣壯話：「有煩惱就抽。」如此五戒不守，六根未淨，你話佢哋唔係假和尚，講都無人信啦。
話時話，要扮假和尚真係話都冇咁易。嗱，袈裟、僧侶鞋好易喺網上買得到，連等同和尚身份證嘅假戒牒都有，執齊成套「生財架生」亦不過二百蚊人仔，表面上係化緣，實際上係濫用社會嘅同情心博取施捨，都係行乞斂財嘅咋。
呢嗱，記者追查其中一名假和尚，發現佢將「化緣」所得嘅港幣兌換成人民幣，花碌碌嘅一百蚊銀紙，足足有成寸厚。唔怪得有人話香港地遍地黃金，錢多人傻喇，俗語話「披起袈裟事更多」怕且要改成「披起袈裟錢更多」至啱咯。
冇計喇，神州大地道德淪喪，造假成風，堂堂佛門聖地亦難得清淨，職業假和尚招搖過市早就見怪不怪咯，其中唔少殺到香港搵食，背後不排除有不法集團操控。其實，呢啲內地丐幫分明違反本港逗留條件，執法部門只要揸正嚟做，不難將不法集團連根拔起，弊在當局有法不依，一直隻眼開隻眼閉，任得佢哋招搖撞騙，分明就係靠害啦。
一句到尾，香港淪為內地丐幫嘅掘金地，對市民及遊客造成不便事小，最怕係損害本港旅遊業形象。唔係靠嚇o架，依家旅遊業已經步入寒冬，當局再唔諗辦法搞掂佢，只會雪上加霜。話時話，啲假和尚除咗呃人騙財，仲要呃神騙佛，唔驚有報應嘅咩！叮！
