城中鏡:黎曉靈訪菲貧童好感觸
啱啱踏入新一年,名媛Kimmy黎曉靈已開展慈善探訪行動,日前遠赴菲律賓巴科洛德(Bacolod)作慈善探訪,同時為機構Fishes and Loaves Inc籌款。一落飛機,參加活動嘅人士就直奔由該機構成立嘅Miracle Central,為逾百名小朋友派飯、文具同麵食等物資,獲小朋友熱情招待、載歌載舞以示歡迎,之後佢哋又去咗小朋友居住嘅貧民窟視察,各人都好感觸。
黎曉靈第二次去菲律賓探訪貧童。
隊伍深入貧民窟,同當地民眾交流。
Kimmy話,該機構由Elaine Eleazar創辦,Miracle Central每日會免費提供約四百份飯餐畀小朋友。佢又話今次已係第二度探訪,第一次探訪時正值佢喪父之後,佢話:「我一心諗住幫佢哋(貧童),點知係佢哋幫番我,我返到香港,大家好驚訝點解我可以喺喪父傷痛之中康復得咁快。」
今次同佢一齊行善嘅,仲有前亞姐冠軍張家瑩同歌手裕美,佢話:「裕美、家瑩今次係自費探訪,出錢又出力,好感謝佢哋。」