城中鏡：無「公」一身輕
仁濟醫院歷屆總理聯誼會除夕夜喺四季酒店舉行倒數派對，唔少名人帶埋家人一齊去玩，聯誼會會長蘇陳偉香見咁多老友留港齊齊迎新年，自然開心晒。我哋見人稱「柯大俠」嘅思捷環球主席柯清輝同太太拍拖到場，事關佢哋係仁濟總理Winnie鄭李華熙多年鄰居，故齊來送舊迎新。柯大俠望落精神爽利，好似後生咗喎？點知佢笑笑口話：「因為冇做公職嘛！」
柯清輝夫婦（左二及右二）與鄭盾尼（左一）、鄭李華熙夫婦係多年鄰居，交情非淺。
蘇陳偉香（左）與丈夫蘇啟聲齊同老友倒數迎新年。
兒子嚴子杰（右）嘅太太嚴韓應心（左）又有喜，嚴玉麟開心到極。
做公職好易老咩？柯大俠就笑稱，近期對香港大學連串風波有感而發啫，因為佢做過港大校委會成員六年、城市大學校董會成員十一年，咁啱前幾日政府公布委任李國章做港大校委會主席，又引起一陣矛盾同對立，難怪佢有咁大感觸喇！柯大俠話，佢做校委或校董時，社會同校園氣氛平和啲，依家大學生要求高咗，處理真係棘手啲。唔怪得佢話唔做公職顯後生喇，因為無咁多嘢嬲囉！
嚴玉麟生多個「仔」
仁濟醫院前主席兼時捷集團主席Stanley嚴玉麟都帶埋全家人去玩，包括兒子嚴子杰、新抱嚴韓應心同趣致嘅孫女。期間Stanley報喜話，新抱又懷第二胎，暫未知BB係男定女，但佢同太太已開心到極。
講講吓，Stanley爆料話，未抱第二個孫之前，佢自己就生多個「仔」先。大家咪誤會，佢講緊嘅係公司最近分拆電子設計業務喺創業板上市。依家個個都呻生意難做，Stanley盤生意受益於智能手機當道，仲可以生「金蛋」，真係羨煞旁人。
