政壇：寶島置業 潘國光心思思
香港人有鋪置業癮，除本地樓外，仲有唔少人熱衷去海外買樓投資或度假。富邦香港投資策略及研究部主管Vicks潘國光都話，考慮幾年後去台灣置業喎。
潘國光幾乎每個月都要去台灣，仲打算幾年後去置業。
Vicks話自加入富邦香港後，出差加埋旅遊，幾乎每個月都去台灣打個轉。不過，佢有當地朋友帶路，依家連佢都對台灣嘅美食同住宿熟晒門路，深感台灣生活質素唔錯，所以佢考慮緊幾年後喺當地置業。咁會揀邊度呢？Vicks話，台北同台中都幾好，旺中帶靜。
雖然家吓佢好似好了解台灣咁，但原來Vicks啱啱加入富邦香港時，對國語幾乎一竅不通，但台灣係富邦集團嘅大本營，所以Vicks都唔敢怠慢，即刻加把勁學習，依家Vicks已經聽得明八成國語，講就更加大膽兼有信心添。
