政壇：中證監主席 睇名知股運
內地股民呢半年見證股市大動盪，由去年嘅暴力救市到近排嘅熔斷機制，唔少股民遭殃之後，都苦中作樂，近日仲攞歷任中證監主席嘅名字嚟調侃，話從佢哋個名，都大概知道佢哋執掌證券大管家時，A股同小股民嘅命運。
股民分析指，尚福林（左圖）年代股市上漲數字為零，郭樹清（中圖）年代係股民輸清，而依家嘅肖鋼（右圖）就一招削光股民。 （資料圖片）
據股民嘅趣味解析，喺○二年十二月至一一年十月由尚福林擔任中證監主席嘅年代，十年A股無點升過，果然同佢嘅名一樣，係「上浮零」。至於接班嘅郭樹清年代（一一年十月至一三年三月），A股就跌到落得番二千幾點，名副其實股民係「哥輸清」。
咁依家係肖鋼嘅年代，又點呢？股民話，一個熔斷機制，就搞到大量股民被削光，仲唔係「削光」？參透唔到？麻煩學好普通話先，然後再領悟吓以下呢幾句啦，「十年一夢上浮零，一朝醒來哥輸清，熔斷削光」。
