政壇：楊岳橋打呔 耍家勝黨友
立法會新界東議席補選提名期展開，尋日只有民建聯周浩鼎同公民黨（公文袋）Alvin楊岳橋報名參選。公文袋油尖旺區議員余德寶前日因打呔問題出醜，黨友Alvin尋日報名參選前，就試範打呔無難度，二十秒內打好條呔，難怪佢事後舉起勝利手勢示威喇，仲幫口話唔知做議員一定要識打呔添。咁佢得閒就應該教吓黨友啦！
楊岳橋（圖）用二十秒示範點打呔，真係要教吓黨友余德寶。
Alvin未來日子除咗要忙於準備選舉外，亦要準備好同對手周浩鼎辯論，佢話今次補選係路線同理念之爭，雙方需要就價值與取向進行辯論，令真理愈辯愈明。至於周浩鼎尋日都報名參選，雖然有傳鄉事派同民建聯內訌加劇，而鄉議局亦未決定係咪支持周浩鼎，但沙田鄉事委員會主席莫錦貴尋日亦有現身撐場。
另外，新思維早前已表明有「強烈傾向」派人參加新界東補選，尋日就傳出唔會派黃成智出選，反而從主席狄志遠同二十四歲嘅秘書長黃俊瑯中「二選一」。
