政壇：民協新丁老雀 反轉議會
多區區議會尋日舉行首次會議，除選舉正副主席，亦討論往後開會嘅議事規則。不過，未定規則前，民協屯門區議員甄紹南同黨友江鳳儀尋日已聯手反轉區議會，新丁議員甄紹南不單主動提出臨時動議，要求更改議事規則，仲大膽「挑機」選主席。至於江鳳儀就屢提安定郵局關閉事件，被指離題。
區會新丁甄紹南未坐熱張櫈就動議修改議事規則。
甄紹南喺主席選舉中越級挑戰民建聯梁健文，只得八票落敗。佢隨後又喺商議議事規則時提出臨時動議，要求取消增補委員制度，但被同為議事新丁嘅新民黨甘文鋒反寸，指增補委員一事已在上個議程討論，再次討論要待半年後，質疑甄提動議嘅時間不適當。
江鳳儀則多次面紅耳赤咁提出要維持議會公義，又乘機提到安定郵局關閉事件，批評政府未諮詢區議會就作出行動，要求區議會去信譴責有關行為。不過，佢竟錯將「去信商務及經濟發展局局長」講成「去信發展局局長」，又將「要求郵局重開」講成「譴責郵局重開」，雖然成功搶鏡，但就老貓燒鬚喇。
