立法會換屆選舉牽一髮動全身，今年嘅變化就可能波及由十八區區議員互選產生嘅立法會區議會（一）功能界別議席，建制大黨民建聯（建仔）嘅區議員人數眾多，加上其他建制支持，對呢個席位擁有壓倒性優勢，有人仲話呢個席位好似變咗建仔嘅黨產咁。既然優勢咁大，建仔今年都考慮新招，有意「抄橋」學工聯會嘅勞工界議席只可做一屆制度，規定黨員如坐呢個位只可做一屆，下屆就要轉戰直選。而首個履行一屆制、睇住時間交棒嘅人好大可能係中西區議員陳學鋒。

立法會區議會（一）議席係由十八區四百多名區議員互選產生，過去呢個席位並冇潛規則，但今年據講建制有意搞搞新意思，引入議席只可做一屆嘅制度，希望黨員用一屆時間去練兵，下屆就轉戰直選，令該黨同建制派可以有系統地培訓新血。至於物色有關議席人選會考慮幾個原則，包括曾當選兩屆區議員以上、曾任區議會正副主席、曾參與立法會直選。但更重要係有關人選嘅地位能夠擺平各方利益，令區議員信服，而且要有潛質喺下屆直選成功。

據悉，有關議席嘅人選包括中西區陳學鋒、深水埗鄭泳舜、北區劉國勳、大埔黃碧嬌、葵青羅競成同元朗呂堅等，但當中以陳學鋒被看高一線。不過，工聯會落實呢個制度亦唔見得成功，咁多年由功能界別轉為直選議員只得王國興一個，建仔複製呢個制度，成效真係好難講。

第一手消息請下載on.cc東網iPhone/iPad/Android/Windows Phone Apps