政壇：Greg蘇攝位反擊拉布戰
踏入新一年，立法會今日就復會審議被稱為「網絡廿三條」嘅《2014年版權（修訂）條例草案》（草案），泛民議員稱會繼續打拉布戰，但嚟緊議會嘅會期好少，有消息話，立法會主席曾鈺成打算破天荒喺下周三特首梁振英（CY）發表施政報告嘅立法會大會上，同埋下周四特首答問大會，連續兩日加會審議草案。唔通政府方面有要求？但就算商務及經濟發展局局長Greg蘇錦樑想捐窿捐罅攝位開會，都要建制派全力撐場至得，否則又響鐘、點人數，分分鐘流會都有之。
立法會今日就會繼續審議泛民議員何秀蘭對草案提出嘅中止待續議案，假期前，議員辯論時已經各出奇謀拉布，復會後又點呢？大部分泛民議員已表明，將繼續透過唔同方法就草案拉布，換言之，響鐘、點人數依然不變。咁樣本周嘅會議一定進度緩慢，下周三就係CY發表新一份施政報告嘅日子，立法會大會按照慣例會喺CY宣讀完施政報告後休會，而翌日大會都係喺特首答問大會結束後就完結。
建制甘「被罰坐」成關鍵
依慣例，呢兩日都唔會有一般嘅立法會會議，即係今個星期嘅大會之後，最快都要等到本月二十日先可以繼續審議草案喇。而二月初又有農曆新年假期，咁搞法，版權例真係唔知拖到幾時。
據知曾鈺成似乎有意破例，了解吓喺下周三CY發表施政報告，同埋翌日特首答問大會後加開立法會大會嘅可能性，以加快審議草案，相信呢啲行動嘅背後唔少得嚟自政府嘅壓力。不過，過去施政報告發表後，各黨派都會召開記者會交代對施政報告嘅意見，仲有冇時間同心機開會呢？真係好難講，部分泛民就講到明，反對喺呢兩日加會，如果唔想再流會，除非建制派齊齊甘於「被罰坐」會議廳啦。今次真係你有你想、佢有佢閃囉。
