工聯會會長林淑儀同立法會議員「象哥」黃定光結咗婚幾十年，一向相當恩愛，但兩夫婦早前出席宴會時，林淑儀就大爆有件事嬲咗象哥幾十年，原來係象哥唔肯戒煙。嬲到咁，有冇幾日都唔睬象哥呀？林淑儀話冇喎！象哥就急急大叫：「你唔好挑起啲事呀！」佢辯解話，立法會成日開會，加上「拉布」，已經冇乜機會食煙㗎啦！睇嚟兩人都係耍吓花槍。

林淑儀（右）最嬲黃定光幾十年都唔戒煙。

其實象哥都知太太關心自己身體健康，佢話自己有「三高」，太太就經常煲呢樣、煲嗰樣嘅湯水畀佢飲，佢飲完都記住太太嘅苦心，唔敢亂食最愛嘅肥膩嘢。宴會當日，附近甚難泊車，象哥擔心太太着高跟鞋行路辛苦，於是先放低太太，自己泊完車再行過嚟，認真細心！問象哥揹起太太唔得咩？象哥話：「我邊揹得起佢吖！佢就揹起我幾十年。」把口真係(口浪)過油！

第一手消息請下載on.cc東網iPhone/iPad/Android/Windows Phone Apps