元旦當日，沙田馬場非常熱鬧，鄉議局主席劉業強（Kenneth）同太太劉葉愛愛（Judy）拍拖入場，Judy睇嚟心情唔錯，話除夕夜同仔女一齊食韓燒倒數，又講吓老公工作忙嘅事，但係Kenneth望上去，就一臉心事重重，仲急急拉走Judy，唔通擔心我哋問起發叔近況？

劉業強（右）同劉葉愛愛拍拖入馬場，相當恩愛。

馬會前主席陳祖澤、南旋集團主席王庭聰夫婦同黃大仙區議員丁志威等都有入場。丁志威係馬場常客，當日睇得好肉緊，仲不時舉起手機拍攝馬匹衝線一刻。王庭聰講起新年願望，就希望新一年香港市民身體健康、一團和氣，又話社會如果有爭拗，就會樣樣都唔好，最好冇爭拗，有事坐低傾！冠忠巴士集團主席黃良柏都有入場，佢名下馬匹仲跑第一，帶挈佢拉頭馬贏獎金，新一年真係有個好開始。

第一手消息請下載on.cc東網iPhone/iPad/Android/Windows Phone Apps