政壇：嫻姐孖星星 行山樂趣多
立法會議員「嫻姐」陳婉嫻一向鍾意行山，尋日佢約咗新「行山友」、環境局局長「星星」黃錦星一齊出遊！不過，今次佢哋唔係純玩，而係約埋學者一齊研究環境同埋東涌規劃。
陳婉嫻（左一）同黃錦星（右一）、鄭炳鴻（左二）等一齊行山研究東涌規劃。（互聯網圖片）
嫻姐經常去東涌行山，佢話，東涌有好多綠化帶，政府要發展東涌，都應該符合低碳精神，不過過往本港規劃新市鎮時，環境局都好似冇角色咁，今次政府又想啟動東涌嘅發展，環境局應該要一開始就「入場」，所以就同香港中文大學建築系副教授鄭炳鴻一齊捉埋黃錦星行山，一路傾東涌規劃。
佢哋一早由逸東邨出發，行入大澳，途經紅樹林等，行咗兩、三個鐘。嫻姐話星星都行開山，尋日對佢嚟講冇難度，沿路有唔少「行山友」認出星星，證明佢都有知名度喎！嫻姐仲話，不排除下次邀請埋其他局長一齊行山，唔知其他局長有冇咁好腳力呢？
