政壇：周浩鼎戰新東 揾新民黨抬轎
立法會新界東補選周二便接受提名，除公文袋嘅楊岳橋外，建仔副主席周浩鼎同西貢區議員方國珊今日都會宣布參選。周浩鼎尋日到新民黨總部，拜會該黨主席葉劉淑儀，爭取支持，對於佢空降補選新東，新民黨最擔心今次支持後，選票一去無回頭。在得知周今年九月（立法會換屆選舉）唔會返嚟，葉劉即刻放心晒。不過，葉劉搶閘踢爆，亦變相證實周浩鼎九月會轉戰超級區議會議席嘅傳聞。
身兼公民力量主席嘅新民黨副主席潘國山話，建仔嘅決定「太急」，佢哋「好多兄弟未做好準備」，內部要「傾多啲」再作調整。有新民黨人更指，周浩鼎今日宣布參選，前一日才拜會新民黨，質疑建仔「老奉」要求新民黨「抬轎」。有份拜會新民黨嘅建仔主席李慧琼惟有急急補鑊，又稱會積極聯絡自由黨、經民聯及鄉事派等政黨，爭取佢哋支持。不過，盛傳有意派人參加補選嘅自由黨就未必賣帳，該黨主席鍾國斌透露，上月底才收到建仔邀請於今日為周浩鼎站台，佢表明唔會到場，強調該黨仍考慮派人參選。
建制協調唔易，泛民主派亦面對多方面「鎅票」，楊岳橋尋日同傳媒茶敍時亦話，建仔、新思維、本土民主前線及獨立方國珊均傳有意參選，初步分析公民黨掌握十八萬票，民記票源亦達十七萬，選情「一啲都唔輕鬆」。
