政壇：鍵盤戰線遙控拉布
踏入新嘅一年，立法會於周三復會後，又將開始審議《2014年版權（修訂）條例草案》嘅工作，議程仲係泛民提出嘅中止待續動議。不過，今次未輪到拉布議員長毛梁國雄、大舊陳偉業主動出招，早前頻搞集會，反對草案嘅鍵盤戰線已率先變陣，佢哋決定周三唔會再喺立法會外集會，改為成立電子通訊群組，透過即時通訊「遙控」支援泛民拉布，只係呢啲支援會唔會有反效果就唔知嘞，最怕泛民議員睇貓紙，知啲唔知啲，搬字過紙出醜！
泛民議員早前被揭對草案內容根本認識不深，上個月要邀請版權法專家為佢哋舉辦「雞精班」，加緊溫習。估唔到呢一點亦係反對團體嘅擔憂，外號「滑鼠娘娘」嘅鍵盤戰線發言人鄺頌晴表示，部分泛民對條例草案了解不深，佢哋決定利用即時通訊手機程式「Telegram」，開設類似media centre（傳媒中心）的群組，邀請泛民議員加入，周三會議當日，佢哋會為泛民議員提供即時資訊，包括版權法相關資料，將資料「餵」到泛民口中。
集會失控 泛民被噓
公文袋、工黨等多個泛民政黨均有代表喺群組內，有議員坦言，版權條例專業、「難明」，仲話有鍵盤戰線提供專業指導係好事喎。
不過，鍵盤戰線今次變招唔搞集會，亦有指係因為上月連續兩晚集會，搞到場外秩序失控，劉慧卿、毛孟靜及黃碧雲等泛民議員更遭集會人士「狂噓」，混亂間，毛孟靜腰部受傷，更一度「見暈」。有反對草案嘅基督徒團體「堅浸人撐公義」原先都有意接棒，在周三舉辦集會，但網上反應唔踴躍，成事機會亦被睇淡。
另外，早年有份創立鍵盤戰線嘅發言人陸冠宇（卡夫卡），已於元旦脫離鍵盤戰線，據聞卡夫卡與鍵盤戰線內部不咬弦，而選擇離開。
