古人云，食得是福。中國人係一個非常重視飲食嘅民族，飲食文化源遠流長，尤其係香港更有美食天堂之稱添。可惜吖，今時今日社會道德淪喪，問題食品五花八門，搞到冇啖好食，連新鮮食材都靠唔住，講起真係可悲。

唔係靠嚇㗎，好多香港人鍾意食魚，認為魚類海鮮比紅肉健康，事實係咪咁呢？未必囉。係人都知，隨着環境污染日益惡化，尤其係工業廢料嚴重污染河流及海洋，魚類吸收咗重金屬物質，唔少殘留體內，特別係魚鰓及脂肪部位。當大魚食咗細魚，體內就會積聚更多毒素，愈肥大愈有毒，龍躉及石斑等深海魚更加係高危品種，人類滿足口腹之欲，重金屬照單全收，日積月累，久而久之，都咪話唔大鑊。

正如專家話齋，重金屬及工業用料無法以清洗或烹調等方法清除，長期進食除咗會傷害肝腎及引致胃潰瘍，仲有致癌危機添。更得人驚嘅係，水銀超標有機會令孕婦生育畸胎，或者引致流產及不育等等，問你怕未。

最慘係一污俱污，問題食品無處不在，又點止食海鮮有風險吖。好似港人最喜愛嘅瑤柱咁，主要來源地大連及青島嘅唔少水域早就受重金屬污染，水質有問題，瑤柱等海味又好得去邊吖。有不法商人驚死唔夠毒，仲以工業用鹼水浸泡瑤柱，搞到毒上加毒，簡直係謀財害命。

即係咁，內地無食不毒，無物不假，早就見怪不怪，問題係天下烏鴉一般黑，就算日本貨亦未必靠得住嘅咋。二○一一年，日本大地震引發海嘯及核洩漏，北海道係受污染最嚴重嘅地區之一，輻射污染最少持續十年八載，如果話嗰度出產嘅瑤柱等海味完全冇問題，你信唔信吖？

正所謂，民以食為天，食以安為先。問題食品氾濫成災，港人冇得選擇，只能望天打卦，弊在港府後知後覺，次次都要等到出事至補鑊，更加令人寢食難安。呢，孔雀石綠海產、蘇丹紅禽蛋、三聚氰胺奶粉、塑化劑食品、坑渠油，港府邊次唔係反應遲鈍？邊次唔係賊過興兵？

講多無謂，食多會滯，行動最實際，食品安全關乎生命健康，把關寧緊勿鬆，港府除咗要打醒十二分精神認真檢驗，更要堵塞法例漏洞，將問題食品拒於門外。當然喇，市民亦要自求多福，千祈唔好攞自己條命較飛吖，叮！