城中鏡：高永文唔怕破相
為內地貧困白內障患者施手術嘅健康快車香港基金，尋日趁元旦日舉行富貴吉祥紅盤宴，唔少政商界名人都畀面出席開餐。其中身兼健康快車副主席嘅保安局前局長李少光帶埋一家大細出場，早前不慎仆親休養半個月嘅食物及衞生局局長高永文，亦同太太江孟儀一齊出席，認真熱鬧。
高永文傷後破相，其妻笑言最近要戒影相。
楊立門（中）同太太（右）現身撐場，方黃吉雯當然高興。
李少光（右）同太太（左）早前首飾失竊，獲囡囡卓穎買翡翠吊墜氹番。
高太江孟儀透露，高醫生受傷後三日都開唔到眼，好擔心對眼唔知會唔會出事，好彩目前康復進度唔錯。不過今次始終縫咗七針，相信疤痕要三、四個月先會褪。問到高醫生受傷後怕唔怕打針，佢笑言冇有怕，更自爆老公大腿曾經生粉瘤，本身係骨科醫生嘅高醫生竟然決定「自己粉瘤自己割」，今次只係一支針，梗係冇有怕。咁傷後使唔使戒口呢？高太就話，西醫冇戒口呢樣嘢，亦唔擔心破相，所以唔使去南韓「執執佢」，不過，受傷之後，近期就要戒影相喎！
AO歌王承諾唱出善款
前年李少光太太畀屋企外傭偷咗貴重首飾典當，李太話至今已經贖番八成失竊首飾，但就唔敢再請外傭。李太笑言，囡囡李卓穎為咗氹番佢開心，買番個翡翠吊墜送畀佢，囡囡咁識做，相信李太冇再介懷。
健康快車創會主席方黃吉雯就話，雖然去年經濟麻麻哋，但籌款依然達標，四列快車已經穿州過省，為逾十二萬六千名內地貧困白內障患者做手術。不過，由於部分快車已經營運多年，唔少手術儀器都夠鐘替換，所以要加緊籌款至得。同場嘅前民政事務局常秘「AO歌王」楊立門就拍心口，承諾會再幫手唱歌籌款，方太唔使擔心啦！
