政壇：陳雲生臨別難忘色魔
喺屯門友愛北選區擔任區議員逾二十載嘅陳雲生，今屆以百多票之差輸咗畀工黨譚駿賢。新一屆區議會展開之際，陳雲生就忙於執拾用咗二十幾年嘅辦事處，佢話咁多年來儲落最多嘅就係居民投訴個案同政府文件，為咗保護私隱同避免內容外洩，好多已經燒毀同碎掉；有用物品同一塊塊嘅牌匾，就運到其妻龍瑞卿嘅議員辦事處。
陳雲生告別區議員生涯，最難忘屯門色魔案。
陳雲生話有唔少個案都令佢非常難忘，包括八一年友愛邨發生治安騷亂，居民包圍警察派出所長達三日三夜，因當時未有區議會，最後搵嚟已故前立法局兼市政局議員杜葉錫恩先平息到風波。陳雲生任內亦經歷轟動一時嘅屯門色魔案，當時居民自發組成自衞巡更隊，護送婦女回家，隊員先要通過品格檢查，並獲發銀雞、藤棒、頭盔等。此外，九三年虎地泵房水浸致斷水、九五年屯門公路塌石意外等，都令佢印象深刻。
陳雲生又話，隨時代轉變，處理嘅投訴個案都有唔同，例如家庭個案，由最初交通不便，婦女要獨自在家管教子女；到後來交通網絡發達，衍生出北上「包二奶」；再轉化至近年老夫少妻、異地婚姻，求助市民一般都會問點搞離婚，但佢認為區議員「寧教人打仔，莫教人分妻」。問到未來工作，佢話好可能係集中帶新人，避免有人中途辭職或只選一屆。
