聖誕、新年長假期話咁快就即將過去,今年大家除咗例牌節目外,仲關注小學生有冇假期操練,雖然教育局假期前發咗通告畀學校,要求避免操練,但中西區區議員「峯鴿」許智峯尋日喺社交網站踢爆,指喺讀緊小二嘅姪仔書包度搵到全港性系統評估(TSA)練習簿。

許智峯

許智峯上載姪仔仍要操練嘅TSA練習簿。(互聯網圖片)

許智峯批評政府把口話反對操練,但係學校就另有對策,反操練根本係廢話咁話。佢仲話,惟有取消TSA,小孩先可免操練之苦。咁講,係咪表示教育局早前嘅指引完全無效呢?睇番佢上載嘅練習簿,打正旗號係小二數學TSA訓練,似乎學界都冇迴避呢個問題,只係唔知巧合定特登咁,整個同步練習之名噃。唔知教育局局長吳克儉會唔會覺得畀人摑咗一巴呢?

第一手消息請下載on.cc東網iPhone/iPad/Android/Windows Phone Apps