政壇：岳鵬約叔伯唔使食檸檬
區議會選舉之後，政圈多咗一班年輕新面孔，政制及內地事務局副局長Ronald陳岳鵬為咗了解新形勢，早前拿拿聲約候任灣仔大坑區議員楊雪盈「飲嘢」，點知畀靚女拒絕，無情情食咗個大檸檬。不過，Ronald冇有怕，繼續約見地區政治人物，日前又見佢出動嘞。
陳岳鵬（右）相約李純鶴傾偈午膳，兩人傾得好開心。
Ronald相約嘅都唔一定係靚女，今次就係資深嘅地區人士、中西區各界協會常務副主席李純鶴，佢哋約喺上環一間潮式酒樓歎中式茶，見兩人一邊食，一邊密密傾，究竟傾乜嘢咁開心呢？Ronald當然唔肯爆料，只係話交流吓啲社會時事，冇乜特別話題，最主要係向前輩學習喎！真係識賣口乖噃。再問佢呢輪有冇放假？佢話聖誕新年冇得去玩，因為局長譚志源放假。咦？咁即係佢做緊署理局長啦，難怪李純鶴都話：「做做吓就做局長㗎喇！」
