民主黨(白鴿黨)主席、立法會議員劉慧卿(卿姐)尋日宣布,明年九月底便會結束議員嘅「光輝歲月」,卿姐指自己做咗七屆議員,議會生涯長達四分一世紀,覺得非常足夠同榮幸,佢以《光輝歲月》一曲形容自己,但強調自己唔會好似歌詞般只有「殘留軀殼」,因佢充滿活力同拚勁,亦打算繼續為香港同國家做事。問到會唔會返內地做嘢,佢笑稱「畀番張證(回鄉證)我先啦!」

嘆議會空前撕裂

卿姐話平常唔太用錢,離任後亦唔太急於搵新工,但佢強調唔會重投新聞界。至於今次唔參選,佢強調唔係一時三刻嘅決定,已經考慮多年。回顧過去,卿姐坦言任內最遺憾係未有「全面直選」,亦為此憤怒,希望有生之年能見到市民自由選出所有立法會議員同特首。講到香港目前面對嘅嚴峻情況,佢認為議會撕裂局面前所未見,好多市民憂心,佢強調,不同黨派嘅議員應要團結同有共識咁去為社會工作,而非互相攻訐。

卿姐又回想過去議會內曾有「八黨共識」,好似○三年「沙士」事件同去年嘅全港性系統評估(TSA)便屬一例,議員之間應該加強合作。

卿姐退下火線,會唔會為第二同第三梯隊「抬轎」呢?原來佢同黨友單仲偕一樣,唔排除會喺名單排第二位參選。至於會否連任黨主席,佢話需要同黨友商量,並留待黨友決定喎。卿姐又話,佢冇興趣參選特首,亦冇能力籌組班底。離開記者會場時,佢向在場記者揮手道別,仲提早講定「後會有期」,呢一幕,真係似足「白鴿小姐」揮別議會舞台。

第一手消息請下載on.cc東網iPhone/iPad/Android/Windows Phone Apps